سياسة الخصوصية

حتى المنصة تشتغل: نعرض منشوراتك، نوصل الرسائل والإشعارات، ونخليك مسجل دخول.

حتى نحمي الطلاب: كل منشور وتعليق وتقييم ينفحص تلقائياً قبل لا ينشر، والمشرفين يراجعون البلاغات. وأكو حد لعدد المنشورات حتى نمنع الإزعاج.

حتى نلخص التقييمات: التقييمات العامة للأستاذ (نصها ونجومها وصفاتها، بدون أسماء المستخدمين أبد) تنرسل لخدمة ذكاء اصطناعي، OpenAI، حتى تكتب ملخص "شنو يگولون الطلاب" بصفحة الأستاذ.

ما نبيع بياناتك، وما نعرض إعلانات، وما نستخدم بياناتك لأي شي إعلاني.

يشوفه الكل: اسم المستخدم مالك، وبروفايلك (الصورة والنبذة والغلاف)، ومنشوراتك وتعليقاتك وتقييماتك للأساتذة (ويا نجومها وصفاتها) ويا اسم المستخدم مالك، وعدد متابعينك وعدد اللي تتابعهم.

محركات البحث: بروفايلك ما يطلع بگوگل ولا بأي محرك بحث ثاني، حتى إذا أحد بحث عن اسم المستخدم مالك ما يوصل لكل شي نشرته. بس المنشورات العامة ممكن تطلع بالبحث ويا اسم المستخدم مالك.

ما يشوفه المستخدمين الثانيين: منو يتابعك ومنو تتابع (بس العدد يطلع للكل)، وتصويتك على المنشورات (بس المجموع يطلع)، ومحفوظاتك، ورسايلك الخاصة، وكلمة المرور.

الأستاذ يشوف نفس الشي اللي يشوفه أي واحد ثاني. ما نعطي الأساتذة ولا المدارس أي معلومة عنك. وبما إننا ما نجمع اسمك الحقيقي ولا إيميلك ولا رقمك، فالشي الوحيد المربوط بحسابك هو اسم المستخدم.

اسم المستخدم يشوفه الكل، فلا تحط بي اسمك الحقيقي أو مدرستك أو شعبتك أو سنة ميلادك. من تسوي حساب، زر "سويلي اسم" يسويلك اسم عشوائي ما يدل عليك.

لا تحط صورة وجهك بالبروفايل، ولا تكتب اسم مدرستك بالنبذة.

بالتقييمات، لا تذكر صفك أو شعبتك أو تاريخ امتحان أو موقف بالضبط. هيج تفاصيل ممكن تخلي الأستاذ يعرف منو الكاتب.

صفحات الأساتذة يضيفها الطلاب، والمشرفين يراجعوها قبل لا تظهر. الصفحة بيها بس الشي اللي يسويه الأستاذ بشكل عام كأستاذ: اسمه، مادته، محافظته، المراحل اللي يدرّسها، وطريقة تدريسه، ويا تقييمات الطلاب.

ما نضيف أبد رقم موبايل الأستاذ ولا عنوانه ولا أهله ولا أي شي من حياته الخاصة.

الصورة اختيارية، والطالب ما يضيف إلا صورة الأستاذ موافق عليها. إذا ماكو صورة، الصفحة تبين أول حرف من اسم الأستاذ.

إذا أنت أستاذ، افتح تذكرة دعم وگلنا إن الصفحة مالتك. إذا صورتك منشورة بدون موافقتك نشيلها مباشرة، وإذا اكو معلومات غلط نصلحها. وإذا ما تدرّس بشكل عام أو الصفحة مو عنك، نراجع طلب حذف الصفحة. بس ما نحذف صفحة لأن تقييماتها مو حلوة.

حسابك واللي تنشره يبقى لحد ما تحذفه أنت. تكدر تحذف حسابك كله من الإعدادات بأي وقت. المنشورات والتعليقات اللي عليها 5 ردود أو أكثر تبقى مكتوب عليها "[محذوف]" بدون اسمك، حتى ما تضيع ردود الناس.

سجلات الفحص التلقائي وإجراءات المشرفين تنحذف بعد 30 يوم.

المحتوى اللي يحذفه المشرفين ممكن نحتفظ بيه فترة قصيرة، حتى نتعامل ويا الاعتراضات وويا اللي يكرر الإساءة.

إذا غيرنا هاي السياسة، راح نحدّث التاريخ اللي فوك. وإذا التغيير مهم، راح ننزل إعلان بالمنصة هم.